கொடூர ஆசை

பழுப்பு வண்ணனே

முக்கண் உடையோனே

எந்தன் ஆசையைக் கேள்

உந்தன் குடுமி பிடித்து

மண்டையை உடைத்து

வழியும் நீர் குடித்து

உந்தன் தசையை

நறுக்கி அரைத்து

சட்னி செய்ய ஆசை

என் அருமை தேங்காயே

நிலவே...

 

நிலவே...

எங்கள் வானத்தில்

காணாததையும் கண்டதையும்

கொண்டு

தேயாத உன்னை

வளர்த்தி தேய்த்தோம்

மாறாத உன்னை

தேய்த்து வளர்த்தோம்

பாடங்கள் பல சொன்னோம்

காதலே...

எங்கள் காதல்வானில்

நிலையில்லா எண்ணங்கள்

வகையறா மாற்றங்களால்

உன்னையும் நிலவோடு

இனம் சேர்ந்தோம்

மகிழ்ந்தும் சோர்ந்தும்

கவிகள் படித்தோம்

படிப்பினையற்று நின்றோம்

காதலும் யதார்த்தமும்

 

உன் நினைவிலே உள்ளம்

....................................................வாழ்வு வாழ்வதற்கே

மறந்து எனை இழந்து

....................................................என்றும் வாழும் உள்ளம்

உயிரோடு உறைந்து

....................................................காதல் பாகத்தோடு

கலந்த உள்ளம்

....................................................வாழும் என்வாழ்வு

பி.கு: இந்த கவிதை புது முயற்சி. ஒற்றைப்படை வரிகள் காதலுடன். இரட்டைப்படை வரிகள் யதார்த்தமுடன்.

காதல் வரிகள்:

உன் நினைவிலே உள்ளம்

மறந்து எனை இழந்து

உயிரோடு உறைந்து

கலந்த உள்ளம்

யதார்த்த வரிகள்:

வாழ்வு வாழ்வதற்கே

என்றும் வாழும் உள்ளம்

காதல் பாகத்தோடு

வாழும் என்வாழ்வு

டிக். டிக்.. டிக்..

என்ன சொல்ல
மெல்ல மெல்ல
மறந்து கொண்டுதான்
இருக்கிறேன்...

சுவரில் தொங்கிய
கடிகாரத்தில்
கேட்ட கேட்ட அந்த
டிக். டிக்.. டிக்...

ஓட்டத்தை சரிபார்க்க
கையிலிருந்து காதில் இட்டு
மணிக்கடிகாரத்தில்
கேட்ட கேட்ட அந்த
டிக். டிக்.. டிக்...

செல்போன்கள் மற்றும்
டிஜிட்டல் கடிகாரத்தால்....
மறந்தேன் அந்த
டிக். டிக்.. டிக்...

நாறும் மணக்கும்

பூவோடு சேர்ந்த
நாறும் மணக்கும்
எண்ணத்தில் விழுந்து
வார்த்தையில் மலர்ந்த
நல்கவியோடு இணைந்த
வாழ்வும் சுவைக்கும்

பூக்கள் மணம்

செல்லும் பாதையின் ஓரம்
செறிந்த பூக்கள் ஆயிரம்
நில்லா நிலைக்கொள்ளா நேரம்
பூக்களின் மணமோ வெகுதூரம்

காரணம்

பேனாவில் மையில்லை
எழுதவும் தாளில்லை
கவிதை எழுத முடியவில்லை
இல்லா காரணம் கண்டேன்
மடிக்கணினியில்
கவிதை வரையாது வரை

இன்ஜினியர் காலேஜ் குரு

தீராத காண்டு ஒண்ணு 
இன்னும் தீராத காண்டு ஒண்ணு
இருக்கா சொல்லுங்க குருவே...

சிஷ்யா...
வருஷங்கள் ஓடினாலும்
கம்ப்யூட்டர் சயின்ஸ் பயலுகள்
அழகான பொண்ணுங்கள
கிளாஸ்மேட்டா இருக்கிறதை
வைச்சசு செஞ்ச அலம்பலைக் கண்டு
மெக். டிபார்ட்மென்ட்  பயல்கள்
கொண்ட காண்டு
வருஷங்கள் ஓடினாலும்
நாளும் தீராத காண்டு.

தேறாதது ஒண்ணு இருக்கா
என்றும் தேறாதது ஒண்ணு
இருக்கா சொல்லுங்க குருவே...

கேளு சிஷ்யா...
அழகான பொண்ணுங்கள கூடவே
இருந்தும்
ஒண்ணும் தேத்தாத
கம்ப்யூட்டர் சயின்ஸ் பயல்கள்
தேறாத ஒண்ணு
எங்க போனாலும்
தேறாத ஒண்ணு

மாறாதது ஒண்ணு இருக்கா
என்றும் மாறாதது ஒண்ணு
இருக்கா சொல்லுங்க குருவே...

சிஷ்யா...
ஆண்டுகள் பல ஆனாலும்
லெக்ச்சர் ஆன நம் சீனியர்
ஆண்டுகள் பல ஆனாலும்
அறிவு மட்டும்
மாறாத ஒண்ணு
மாத்த நினைச்சாலும்
மாறாத ஒண்ணு

பி.கு:  நான் கண்ட இன்ஜினியர் காலேஜ் மாணவர்களிடம் பெற்றது.  நகைச்சுவையாக கொள்ளவும்.

அன்றாடப் பொருள்கள் - 4

நினைவுகள் ஒரு சட்டத்தில்
நினைக்க பல கட்டத்தில்
ஆணி அடித்தார் போல்
எல்லோர் நெஞ்சினில் ...
*
பூக்களும் குங்குமமும்
இழந்ததை நினைவு
கொள்ள
இறையாய் மனதில் கொள்ள
**
மனிதர் மட்டும் அன்றி
கடவுளும் சட்டத்திலிட்டு
எங்கள் வீட்டில்
ஆணியடித்த
புகைப்பட சட்டம் ...
****

கைக்குள் அடக்கம்
உன்னுள் பல செயல்கள்
அடக்கம்
*
கறை சில களைவாய்
சில நேரங்களில்
பூச்சும் செய்வாய்
**
குட்டையாக இருந்தாலும்
நாளும் என் முகம்
துடைக்கும் கைக்குட்டையே...
***

நீ சில நேரங்களில்
என் மான த்தைக்
காக்கும் காவலன்
*
ஒட்டிய வயிறோ
புடைத்த வயிறோ
நீயின்றி அமையாது
உடை அலங்காரம்
**
வண்ணங்கள் சிலவற்றில்
காலங்களின் சில  மாற்றத்துடன்
என்றும்  நான் அணியும்
பெல்டே ...

செய்கையின் திறன்

மாறும் செய்கையின் திறன் தினம்
மாறும் உடன் எந்தன் குணம்
புதிதாய் காண்பதுபோல்
தவிக்கும் மனம்
மாறும் எண்ணங்கள் ஆயிரம்
காட்டும் வாய்ப்புகள் கணக்கிலா
தருணம் காணா சில தினம்
தக்க தருணத்துடன் சில தினம்
கருத்துடன் காணும் சில தினம்
கருத்த்தைக் கருதா சில தினம்
அறிந்ததை அளக்கும் சில தினம்
அறியாததை அறியும் சில தினம்
அறிந்தும் அறியாமல் சில தினம்
சிந்தையின் சிரத்தில் சில தினம்
சிரமம் கொள்ளாமல் சில தினம்
மாறும் செய்கையின் திறன் தினம்
மாறும் உடன் எந்தன் குணம்
புதிதாய் காண்பதுபோல்
தவிக்கும் மனம்
 

ஆட்டம்

ஆடிய ஆட்டம்தான் என்ன
ஆடும் ஆட்டம்தான் என்ன
ஆடப்போகும் ஆட்டம்தான் என்ன
ஆடிக்கொண்டுதான் இருக்கிறேன்
ஆடும் ஆட்டம் அறியாமல்
ஆட்டம் கொண்டேன் இன்னும்
ஆட்டுவிப்பது எதென்றியாமல்
அடிமேல் அடிவைத்து
ஆடிக்கொண்டுதான் இருக்கிறேன்
ஆட்டம் கொள்ளாமல்

அன்றாடப் பொருள்கள் - 3

பல ஆயிரம் முறைகள்
ஏந்தினேன் உன்னால்
கோப்பைகளை..
*
நாள் மாறாமல்
எல்லா உணர்வுடன்
என்னுள் கலக்க
உதவினாய்
**
நாளும் என்
உதடோடு உறவாடும்
தேநீர் கோப்பையை...
****

பல நாட்கள்
நில்லாமல் ஓடினாய்
இருத்தும் குறையவிலலை
நம் தூரம்
*
கோடையில் நீ குளிர்
மழைக்காலத்தில்
எனை தவிர்
**
இறக்கைகள் இருந்தும்
பறக்காமல் எனக்கு
காற்று வீசும்
சுழல்காத்தாடியே...
***
கட்டுபாட்டு எல்லாம்
என் கையில்
நீ இருக்கும்வரை
*
உன்னைத் தொடாமல்
கேளிக்கை ஏதுமில்லை
எந்த வீட்டிலும்
**
நாளும் என் கையில்
விளையாடும் தொலைக்காட்சி
தொலையியக்கி (Remote Control)
***

அன்றாடப் பொருள்கள் - 2

விவரமறியும் பருவம்
முன்னே என்
கையோடு உன் மெய் சேர்த்தாய்
*
வாழ்வோடு பிணைந்து
என் அறிவை எனக்கு
அறிய செய்தாய்
**
தேர்வில் எனக்கு தோள்
கொடுத்தாய்
சில நேரங்களில்
களங்கமிலா கைகளையும்
கறைப் படுத்தினாய்
***
கால மாற்றத்தில் இன்று
என் கைகளில் சில நிமிடங்களே
ஏந்திருக்கும்
எழுதுகோலே ...
****

நீயில்லாமல் நானில்லை
உன் உறவில்லை என்றால்
எனக்கில்லை ஒரு உறக்கம்
*
உன்னோடு என் கனவு
உன்னோடு என் கவிதை
உன்னோடு என் அழுகை
**
பஞ்சான உன்மேனியை
பதம் பார்த்தும்
என் காலடியில் கிடத்தியும்
என் தலை கணம் தாங்கினாய்
***
தரையோ பட்டுமஞ்சமோ
உன் உறவே
எனக்கு உன்னதம்
****
இரவின்மடியில் மட்டுமின்றி
பகலிலும் உறக்கம்.
என் அருமை தலையணையே ...
*****

வானவில்

வண்ணச்சிதறல்கள் வானில்
இடும் கோலமாய் வானவில்
எண்ணச்சிதறல்கள் வார்த்தையில்
இடும் கோலமாய் கவிதைகள்

நேரங்கள்

திட்டமிடா மனதுடன் அலைந்து
திரியும் திடமிலா எண்ணங்கள்
திரும்பி பார்க்கையில் தெரிந்த்தது
திருடிய திட்டமிடா நேரங்கள்

திட்டமிட்ட எண்ணத்துடன் இருந்து
திருப்பிய கவனத்துடன் எண்ணங்கள்
திருத்தும் வகையில் தெரிந்த்தது
திரிந்து திரியும் நேரங்கள்

சுயநலம்

பிறர்நிலை உணர மறுக்க
நடுநிலை மாறும்
தன்னிலை மறக்க
தடுமாறும்
தன்னை மட்டும் நினைக்க
தடம் மாறும்
எந்நிலை உணராமல்
இடம் மாறும்
எடுத்துரைத்தால்
நிறம் மாறும்

அனுமானம்

முன்னோக்கு பார்வையில்
கருத்துக் கொள்ளும்
எந்தன் அனுமானம் இயல்பு
அனுமானத்தில் அடிப்படையில்
தானே எந்தன் அறிவு
அனுமானம் ஆழத்துடன்
ஆழங்கொள்ளும் என்றும்
அனுபவமும் அறிவின் ஆழமும்
மாற்றும் அனுமானத்தின் ஆழம்

பூரணமறியாத அனுமானத்தை
அலசி ஆராய
அனுமானத்தில் கேள்வி வர
ஆடிதான் போகும் எந்தன்
அறிவின் அடித்தளம்

அர்ச்சனைகள்

எத்தனை அர்ச்சனைகள்
எத்தனை அர்ச்சனைகள்
சொல் பேச்சு கேளாமைக்கு
அன்னையிட்ட அர்ச்சனைகள்
சொல்லாத பேச்சுக்கு
தந்தையிட்ட அர்ச்சனைகள்
கேலி பேச்சுக்கு
தமக்கைகளிட்ட அர்ச்சனைகள்
சொன்னதை செய்யாதற்கு
மனைவிடம் அர்ச்சனைகள்
சொல்லாமல் செய்த செய் கைகளுக்கு
நண்பர்களிட்ட அர்ச்சனைகள்
கல்லாகியும்
கலங்கியும்
கலக்கியும்
கலங்கியவர் கண்டு
புளாங்கிதம் கொண்டும்
காலந்தோறும் அர்ச்சனையுடன் ...

பொய்

இல்லாததை இருப்பதாயென

இருப்பதை இல்லாததென

காட்டும்

எங்கும் பரந்து

கிடங்கும்

இருப்பதே தெரியாமல்

எதிலும் கலந்து

இருக்கும்...

தருணம் வருகையில்

தாவி வரும்...

வார்த்தையில் பொய்

உருவகத்தில் பொய்முகம்

அரசியலில் சாதாரணம்

மாற்றும் எதன் தோற்றம்

தேவையில் சாதுரியம்

தேவைப்படுவோர்க்கு நம்பிக்கை

கவிதையில் அழகு

காதலுக்கு இன்பம்

தத்துவத்தில் மாயை

நன்மை பயக்குமெனின்

அடங்கும் வாய்மையில்

குறிக்கோள்

அறியாத தேவைகள்

புரியாத புதிர்கள்

தெரியாத தேடல்கள்

தெளியாத தேர்வுகள் 

இடையினில் இடரும்

நெஞ்சம்...

தேவை ஒரு குறிக்கோள்

குறிக்கோளுடன் செயல்கள்

செயலுடன் எண்ணங்கள்

எண்ணமுடன் தெளிவுகள்

தேடுகிறேன் இன்னும்...

எந்தன் குறிக்கோள்

திறந்த புத்தகம்

ஏடுகள் அதிகம் 

புரியா பல பக்கம்

இருந்தும் என் மனம்...

ஒரு திறந்த புத்தகம்

அறியாதது இங்கு அதிகம்

ஆங்காங்கே அந்தரங்கம்

சில இங்கு அடக்கம்

பக்கங்கள் சிலவுடன்  வேகம்

பக்கங்கள் சிலவுடன் சிநேகம்

பக்கங்கள் சிலவுடன் பூடகம்

பக்கங்கள் சிலவுடன் வெட்கம்

பக்கங்கள் சிலவுடன் சோகம் 

பக்கங்கள் சிலவுடன் மயக்கம்

இருந்தும் என் மனம்...

ஒரு திறந்த புத்தகம்

பக்கங்கள் எல்லாம் வித்தியாசம்

பக்கங்கள் ஒன்றொன்று மாறும்

பக்கங்கள் ஒவ்வொன்றும் புதுதுவக்கம்

பக்கங்கள் சொல்லும் நோக்கம்

பக்கங்கள் சொல்லாதா விளக்கம்

இருந்தும் என் மனம்...

ஒரு திறந்த புத்தகம்