கஜல் துளிகள் 4

சுவரில்லா சித்திரம் காதலென உரைத்தாய்
காணும் முன்னே ஏனோ கண்ணைப் பறித்தாய்

கல்லுக்குள் ஈரம் காண முடியவில்லை
கண்ணின் ஈரமோ இன்னும் காயவில்லை

காதலால் கனவுகள்பல கண்டுக்களித்தேன்
காதலின்றி என்றும் கனவுகளில் விழித்தேன்

தினமும் காதல்பாடம் படித்திட நினைத்தேன்
காதல் படிப்பினைக் கண்டு இன்று நொந்தேன்

தேர்தல் நாள்

ஊரில் எத்தனை தெரியா முகங்கள்
நல்லாத்தான் இடுது வணக்கங்கள்
முகங்கள் மலர
வாய்கள் விரிய
தேர்தல் நாளின் மவுசுகள்

கேள்விகுறியாய் களத்தில் வேட்பாளர்கள்
வேள்விகளுடன் என்றும் போராட்டங்கள்
நேர்த்தியாய் பல தியாகம்
தேர்தல் நாள் வரையான யாகம்
விடைக்காணும் வரை இழக்கும் உறக்கங்கள்

எங்கள் நாட்டின் மக்களாட்சி
தேர்தலில் காணலாம்பல காட்சி
தேர்தல் காலம்
மனசாட்சி காணோம்
காணும் பணப்பழக்கத்தின் புரட்சி

ஆட்சியில் கண்டோம் சில(?) கொள்ளை
ஆயினும் எங்கள் மனமோ வெள்ளை
என்னைக் காணா விடினும்
தேர்தல் நாள் வரட்டும்
தலைமேல் கொள்வேன் உங்கள் கட்டளை

மாறாமல் நடைபெறும் கூத்து
மாற்ற முடியும் தலையெழுத்து
தேர்தல் நாள்
கையில் மையிட்டு
வோட்டு இடு தகுதியறிந்து

-  செல்வா 

என் இருப்பு

எதையும் பற்றா மனம்

என்னை மறக்க

ஏங்கும் எதையோ எண்ணி

என்றும் தவிக்கும் மனம்

எதை இழந்தது எண்ண

நாளுடன் நான்

நாலும் காண

நாட்கள் மெல்ல நகர

என் இருப்பு

- செல்வா

அன்னையர் தினம்

உலகம் உருள உதவும் உன்னதம்
அகிலம் அளக்க இயலா அற்புதம்
எங்கும் நிறைந்த
அன்னை நீயே உலகின்
உரைக்க முடியா வேதம்

அன்னையின் அன்பு இதயம்
காலத்தை வெல்லும் காவியம்
நாளும் நனைந்த
மனம் காணும் அன்னையே
நித்தம் வாழ்வின் அழியா சத்தியம்

அன்பின் அணையாவிளக்கு அன்னையே
நன்னெறியில் வளர்த்தாய் என்னையே
அன்னையர் தினம்
அகிலம் கொண்டாட
எல்லாப் பெண்களில் கண்டேன் உன்னையே

- செல்வா

பேசும் மௌனம்

வார்த்தைகள் கொண்டு வடிக்காதப் புத்தகம்
தீர்க்கமாக மனதுடன் கொள்ளும் இணக்கம்
நேர்படுத்த உதவும் அற்புத மார்க்கம்
மனம் உன்னோடு பேசும் மௌனம்

வடிவங்கள் வசங் கொள்ளும் வார்த்தைகளுடன்
கடிவாளம் இல்எனில் பிடிபடும் பிணக்குகளுடன்
படிப்பினை யறிந்து உரையாடு மனதுடன்
வடிவத்துடன் வளமாய் பேசும் மௌனம்

பேசும் வார்த்தைக்கு சில அர்த்தங்கள்
பேசா வார்த்தைக்கு பல அர்த்தங்கள்
நேசிக்கும் நெஞ்சில் பல தேற்றங்கள்
அர்த்தங்கள் ஆயிரம் பேசும் மௌனம்

உலகில் பேசா தென்று ஒன்றுமில்லை
விலகிக் கேளாதென்று மனங்கள் பலவுண்டு
நிலை மனதில் சலனமற்று நிற்கும் அறிவு
ஆழ்நிலை யுடன் பேசும் மௌனம்

- செல்வா

பி.கு: கவிதைமனியில் இந்த வாரம் பதிவில் வந்தது

கஜல் துளிகள் 3

வானில் மேகக் கூட்டங்கள் காணா நட்சத்திரங்கள்
கலைந்தது மேகங்கள் சிந்தியதோ உதிரங்கள்

கரைத் தொட்டும் தொடாமல் செல்லும் அலைகள்
கரையும் மனத்தோடு என்றும் நகரும் என்நாட்கள்

நூலாடும் நெஞ்சினில் வேல்விழி காண்கையில்
போராடும் தினமதில் நினைவோ நறுமுகையில்

கவடுகளற்று வந்தது உன்மேல் காதல்
சுவடுகளற்று அழிந்தது இன்னும் உறுத்தல்

மடியில் தவழும் தென்றல் மனதிலென்றும்
வடிவங் கொள்ளும் காதல் முற்றும்

- செல்வா

பி.கு: கவடு - கபடம்

தரிசனம்

தினம் தினம் உந்தன் தரிசனம்
காண வேண்டும் கரிசனம்
ஓடும் உன்பின்னே
ஓடும் காலமோடு
வேண்டும் உந்தன்  அரியாசனம்


என்னை யறியாமலே அனுதினம்
உன்னை சுற்றும் என் புவனம்
கண்ணோடு காண
ஈர நெஞ்சோடு
என்னைக் கட்டும் ஏகபந்தனம்


நாளோடு நான் காணும் நளினம்
காதல்  கொள்ளும் தினம் ஜனனம்
உன்னை நினைக்க
உண்மை  உரைக்க
நெஞ்சோடு காணும் தூவானம்

- செல்வா 

பி.கு: லிமெரிக் வகையில் எழுதியது 

கஜல் துளிகள் 2

கல்லிலும் நீருண்டு அறிந்தேன் உன்னால்
நீரிலும் கள்ளுண்டேன் உன் நினைவாலே

மழைத்துளிகள் ஒவ்வொன்றிலும் உன் முகம் தெரியுது
ஒவ்வொரு துளியிலும் என் இதயம் நனைகிறது

கண்ணே தாகங் கொண்டு பருக வந்தேன் காதல் நீர்
நாவற்று தவித்தேன் உந்தன் காதல் கானல் நீர்

கண்டேன் பார்வையின் ஓரம் நெஞ்சில் ஏறுதே பாரம்
சென்றாய் வெகுதூரம் கண்ணில் இன்னும் ஈரம்

வானவில்லின் வண்ணத்தின் அழகோ கண்ணில்
வானவில்லின் மறைவின் வலியோ மனதில்

காதல் கார்மேகங்கள் மூடும் என் வானம்
மனமோ உன் காதல் மழை காணா பாலைவனம்

- செல்வா

வள்ளுவம் வாழ்வதெங்கே

பொய்மையும் வாய்மை இடத்து புரைநீர்த்து
தனக்குமட்டும் நன்மை செய்யின் எண்ணி
தீமை அலாதுபல சொல்லி

எப்பொருள் யார் யார் வாய்கேட்பினும்
மெய்பொருள்தனை யறியாமல் மயங்கி
மனம் சென்ற இடத்தான் செல்லவிட்டு
நன்றின்பால் உய்யதா அறிவுடன்

செல்லிடத்து சினம் கொண்டு வளர்த்து
அல்லிடத்தில் முதுகை அழகாய் வளைத்து
நகையும் உவகையும் மறந்து

சுய அன்புடன்
எல்லாம் தமக்கு உரியவராக இருந்து
என்புதோல் போர்த்த உடலாய்
இன்புற்று வாழத்தான் துடிக்க

அருளில்லா உலகில்
பொருளில்லார்க்கு
இவ்வுலகம் இல்லையென இசைந்து
ஈதல் இசைபட வாழ மறந்து

ஈன்றாள் பசி காணாதிருக்க
சான்றோர் பழிக்கும் வினைகளுடன்
முதியோர் இல்லம் சேர்த்து

அற்றால் அளவறிந்து உண்ணாமல்
பெற்ற பலநோய்களுடம்
அளவறியா ஆயிரம் மருந்துடன்

உண்ணற்க கள்ளை உணில்உண்க
அரசாங்க கஜானாவை நிரப்பி
இலவசப் பிச்சைகள் கொள்ள

வள்ளுவத்தை மெல்ல வழக்கொழித்து
வள்ளுவம் வாழ்தெங்கே? ஏட்டிலா ?
மனப்பாட செய்யுளிலா?

ஆயிரம றமுண்டு ஆயிரம் திறனுண்டு
ஆயினும் வாழ்விங்கு கேள்விக்குறியாய்
வள்ளுவம் வாழதான் அன்றி
வார்த்தைகளில் மட்டும் வாசம் செய்யல்ல
வள்ளுவன் தந்து
வான்புகழ் கொண்ட தமிழ்நாட்டில்
வள்ளுவம் காணாதவன் தமிழனல்ல
வழக்கு ஒன்று வேண்டும்
வானுயரப் புகழுடன் வாழ வேண்டும்

- செல்வா

பி.கு: தினமணி கவிதைமனியில் வந்தது

கஜல் துளிகள்

நிழலும் முன்செல்லும் நிலவே நீ என்பின் நின்றால்
நிழலும் மறந்தேன் நிலவே நீ என்முன் நின்றதால்

பாவை மனதினில் விழுந்தேன்
உடைந்தது என் மனம் பாவை அங்கில்லை பாறை

எங்கும் செல்லும் காதல் உன்னிடம் செல்லா காதல்
விட்டு செல்லவில்லை என்னிடம் இன்னும்

மறதி நோய் என்னிடம் உன்னை மட்டும் மறக்காதால்
மனதை மறைக்காமல் சொல்ல மறந்ததால் மறதியில் நான்

வானவில்லாக நீ மழைக்காலம் இல்லை உன் மனதினில்
குளிரும் என் நெஞ்சம் கத்திரி வெயிலிலாக நீ என்றாலும்

- செல்வா

உந்தன் காதல்

கனிவது காதல் என்றும்
       தெளிவது நெஞ்சம் என்று
வஞ்சியுன் உள்ளம் நோக்கி
        உயிரது துடிக்கும் உள்ளில்

உளமது உன்னுக்  கில்லை
        என்றதும் நொறுங்க வில்லை
சொல்வது கள்ளம்  என்றும்
       தெரியுது உருகும் உள்ளம்

மல்லிகை மணமும் வீசும்
        கன்னியுன்  விரியும்  கூந்தல்
கனவுடன் எண்ணும் எண்ணம்
        உன்னுடன் என்றும் கொஞ்சும்

சிந்தனை சிதறும் என்னுள்
        சித்திரம் வரையும் கண்ணுள்
பாமரம்  என்றும்  வீசும்
        தாமரை உன்னால் வாழ்வும்

    -   செல்வா

பி.கு: விளம் மா தேமா - வாய்பாடு
   

அன்னை

சந்தம் : தந்தனந் தந்தந் தனதான

இந்துயிர் செல்வம் கருவாகி
விந்துவும் வம்சம் உருவாகி
அன்புடன் ஏந்தும் உயிராகி
இவ்வுயிர் மண்ணின் மணியாக
புத்திரன் உன்னால் பிறந்தாகி
பிஞ்சுநெல் கைக்குள் உறவாட
என்னையும் நித்தம் வளர்த்தாகி
என்றுமென் தெய்வம் வடிவாக

மின்னுதல் உந்தன் முகமாக
ரம்மியம் உந்தன் அழகாக
அற்புதம் உந்தன் வழியாக
கண்ணியம் உந்தன் மொழியாக
கற்பிதம் உந்தன் நயமாக

வாழ்நாளில் உன்னையென் அன்னையாக
பெற்றதென் வாழ்வின் வரமாக


- செல்வா

அனுதின நிலை

சந்தம்:
தனதன தானத் தனத்த தனதன
தனதன தானத் தனத்த தனதன
தனதன தானத் தனத்த தனதன - தனதானா


வழிமுறை யாதும் அறிந்து அவளடி
தொடரவும் யாதும் மறக்கும் - அவளது
முடிவறி யாமல் பதைக்கும் அனுதின நிலைதானோ

தேடும்வழி தூரம் தெரிந்தும் முழுமதி
முகமதில் மோகம் துரத்த - தினமதில்
உளமது தேடும் உரைக்கும் அனுதின நிலைதானோ

உடையது மாறும் உறக்கம் குலையுது
கருவளை காணும் கருங்கண் களதுவும்
தடையது தானும் நெறிக்கும் அனுதின நிலைதானோ

அழகுனைக் கூறும் அனைத்தும் அழகடி
அடைமழைக் காணும் மனத்தில் தினமடி
உறவதில் கூடும் மணத்தில் அனுதின நிலைதானோ

- செல்வா

சமுக வலைத்தளங்கள்

எட்டிப் பார்க்கும்
குட்டிச் செய்திகளைத்
தத்தி தத்தி பின் தொடர
ட்விட்டர் கணக்கு

திண்ணைப் பேச்சுகளும்
பாடமாய்
சில காணொளிப் படங்களாய்
பல அன்பர்களுடன்
கைக்கோர்க்க
முகநூலில் சேர்க்க

கண்கள் கண்டது
மனதில் பதிந்தது
போதா தென்று
கையடக்க தொலைபேசியின்
காமிராவிலும் பதிய
உலகமும் காண
உபயம் சமுக வலைத்தளங்கள்

யான் கண்ட இ(து)ன்பம்
காண்க இவ்வையகம் என
யாதும் குறையாத வகை பங்கிட
யூ-ட்யூப் காணொளி

என்னடா நடக்குது நாட்டிலே
என்று கேள்வி கேட்காது வகையிலே
நடப்பை அப்போதே அப்டேட்
வாட்ஸ்-அப்ஸ் மூலம்

கண்ணுக்குத் தெரியாத வலையில்
தகவல் கைக்குள்ளே
உலகம் சுருங்குது

- செல்வா

காதல்வினைகள்

காதல் ஒருதலையாய்
காதல் கொண்டு
காதலில் விழுந்து
காதலில் கட்டுண்டு
காதலில் மிதந்து
காதல் கனிந்து
காதலில் உருகி
காதலில் கவிழ்ந்து
காதல் துரோகம்
காதல் கடந்து
காதல்மீது காதல்

வினாக்கள் கொள்ளாமல்
வினைகள் எத்தனை காதலுடன்
விடையில்லாமல்
தடை மறந்து
மடை திறந்து
இடைவிடாமல் கொள்ளும்
காதல்வினைகள்

- செல்வா

மயக்கம்

மயக்கத்தின் மடியிலே
தயக்கமதுக்  கொள்ளாமல்
இயக்கத்தில்  என்றும்
வயக்கம் இழந்து
முயக்கத்தில் முண்டி
உயக்கத்தில் உருள
கயக்கதில் நான்

மயக்கம் மதுவில் என்றும்
மயக்கம் உணர்வில் என்றும்
மயக்கம் அன்பில் என்றும்
மயக்கம் மனதில் என்றும்
மயக்கிருந்தேன் என்றும்

மயக்கம் தேவையைத்  தாண்ட
மயக்கம் தேவையற்றத்தைத் தூண்ட
மயக்கம் தேவையை மறக்க
மயக்கம் தேவையில்லாமல்
மயக்கத்தின் மடியில் நான்

  - செல்வா
முயக்கம் - புணர்ச்சி   வயக்கம் - ஒளி   உயக்கம் -  துன்பம்   கயக்கம் - கலக்கம் 

வாக்கு உன் செல்வாக்கு

என்றும் உந்தன் வாக்கு
உடன் உயரிய நோக்கு
உள்ளதை அறி
உரியதை செய்
நல்ல சமுதாயத்தை உருவாக்கு

செல்லா வாக்கு வேண்டாம்
இடா வாக்கும் வேண்டாம்
ஏதும் சரியில்லை
யாரும் பிடிக்கல
இருக்கவே போடு நோடா ஒட்டும்

நாட்டுக்கு போடும் ஓட்டுக்கு
விக்காதே சில நோட்டுக்கு
வித்தது வாக்கில்லை
உன் வாழ்வும்
தொலைந்திடும் கேட்டுக்கு

யானைக்கு ஒரு காலம்
பூனைக்கு ஒரு காலம்
பழமொழி தேர்தலுக்கு
தேறாது - தீதுக்கு தீது
எப்போதும் தீராது நம் கெட்டக்காலம்

தேர்தல் சொல்லும் கணக்கு
மக்களின் தேர்தல் வாக்கு
வேட்பாளரை அறிந்து
நன்கு பயன்படுத்து
உயரும் வாக்கின் செல்வாக்கு

- செல்வா

பி.கு: தினமணி கவிதைமணி பிரசரிக்கப்பட்டது. லிமெரிக் வகையில் எழுதியது

அன்புமகள்

அன்பு மகளின் ஆனந்தம்
கண்டு கண்ணில் நீரோட்டம்
உன்னை வன்சொல் சொல்லாது
திண்ணம் கொண்டேன் உயிரோட்டம்

சின்னச் சின்னக் குறும்பாட்டம்
எந்தன் மனதின் அச்சுக்கள்
என்னை யியக்கும் வெப்பங்கள்
பந்தங் கொள்ளும் மூச்சுக்கள்

நாளும் மகளின் மாற்றங்கள்
மனங் கொள்ளும் ஆனந்தம்
மாறும் நெஞ்சின் கோணங்கள்
கனியும் வாழ்வின் ஆதாரம்

- செல்வா

பி.கு: மா மா காய் வாய்பாடு - அறுசீர் விருத்தம்

கலைநயம்

உருமாறும் உணர்விலே

உனையெண்ணி  மறதியில்

தவிக்கிறேன்  தனிமையில்  

துடிக்கிறேன் வெறுமையில்

பனிக்காலம் பொழுதிலே

குளிரோடு மனதினில்

உனதாக்கி கலைநயம்

மயக்கத்தில் களிநடம்

தினந்தோறும் நினைவிலே

கருவோடுக் கருத்துடன்  

உளமாகி உயிரெழக்   

கனவோடுக்  கலைகிறாய்

- செல்வா

பி.கு: புளிமாங்காய் + கருவிளம்  வகையில் வஞ்சித்துறை

இறைநிலை

குறைகள் கொண்டும்  

கறைகள் பலவால்  

சிறைப் பட்டாலும்

முறைகள் அறியாவிடினும்

மறைநிலை தம்மில்

இறைநிலை என்றும்

உறைவது உண்டு

மிறையது கொள்ளாமல்

பொறையுடன் உணர்விலே

நிறையது  காண்  

• செல்வா

பி.கு : மிறை - வருத்தம், வேதனை

மின்மினிகள்

சந்தம்:

தய்யதன தான தய்யதன தான

தய்யதன தான ...... தனதான

கன்னிமகள் காண என்மனமும் தேடும்

மின்மினிகள் யாவும் தொடுவானில்  

அல்லிவிழி கூடும்  அன்புமடி வேணும்  

அள்ளித்தர யாவும் நினைவாகி

அல்லல்பட ஆசை  கண்களிலும் மாற்றம்  

கட்டழகி நேசம் எனையாளும்    

உள்ளமது தூது கொள்ளுவது மோகப்  

புன்னகையைக் காணக்   கவியாகி

மெல்லவரும் பாட்டு நித்தமது கேட்டு

நெஞ்சமதில் ஆடும் விளையாட்டு  

தொட்டுவிட தூவும் மல்லிகையின் வாசம்

மிஞ்சுமது நேசம் குறையாது  

- செல்வா  

கனித்தோட்டம்

கண்முன் என்றும் அழகிய கனித்தோட்டம்
கண்டும் இரசிக்கவில்லை கால்களில் ஓட்டம்
திண்டாடுது மனமோ புரியாத ஆட்டம்
கண்ணைக்கட்டி வாழ இன்னும் பல கூட்டம்
உண்மை அறியாமல் எதன்மேலோ நாட்டம்
முண்டியடித்து முன்னே நிற்கத் திட்டம்
புண்படுத்தப்பின் எப்போதும் கொள்ளும் வாட்டம்
மண்ணில் எதுவும் மடியும் அதுவே சட்டம்

- செல்வா

நட்பாகி

சந்தம் :
தத்தன தனதன தத்தன தனதன
தத்தன தனதன ...... தனதான

ஒத்திய உணர்வுடன் ஒப்பிய குணங்களும்
நண்பனின் மனமது எனதாகி

நித்தமும் மனதுடன் சுற்றிய இனியவன்
சுட்டெரி கனலிலும் உயிராகி

சத்திய உறவுடன் தொட்டது சுகமது
அக்கண மது துணை உளமாகி

மித்திர னவனது நட்பது இனியது
எப்போதும் அருளது பலகாலம்

உத்தம உரமுள உள்ளத்தில் உருகிடு
மெய்படும் உறுதியில் நட்பாகி

- செல்வா

பி.கு: "கைத்தல நிறைகனி அப்பமொ டவல்பொரி
கப்பிய கரிமுகன் ...... அடிபேணிக் " சந்தத்தில் எழுதியது.

தொட்டு சென்ற தென்றல்

என்னை மறந்து எதனுள்ளே ஒளிந்த
என்னை மென்மையாக தொட்டு
சென்றது ஒரு தென்றல்
என்னை மறந்ததை மறந்து
தென்றல் சென்ற திசையில்
தன்னில் பார்வை சென்றது
தென்றல் வரும் திசை
தன்னை நோக்கி நின்றது
பின்நோக்கி என்னை தள்ளியது

தென்றலோடு தன்னை மறந்த காலம்
முன்னில் வந்து நின்றது
மின்னலாய் கண்ணிலே தெரியுது
புன்முறுவல் கொண்டு எண்ணினேன்
பொன்னில் பொறிக்க வேண்டிய காலமது

- செல்வா

அணையட்டும் சாதீ

அணைக்க வேண்டிய சாதி
கனலாய் எரியும் சோதி
பேதங்கள் போற்றும் மனம்
தூபங்கள் போடும் தினம்
வெறிகளுடன் குடிக்கும் குருதி

பேதங்கள் மனிதனின் சாபங்கள்
வேண்டாவிடின் கொல்லப்படும் வேதங்கள்
தர்க்கம் பல உண்டு
வீணாக விவாதம் உண்டு
சாதிகள் போடும் வெளிவேஷங்கள்

பள்ளியில் சேர சாதிச்சான்றிதழ்
சாதீக்கு கொடுத்தோம் அழைப்பிதழ்
ஆளுக்கொரு என்றும் நீதி
கேட்கவில்லை இல்லை நாதி
கல்வியின் பயனோ இன்று பாழ்

தனியோருவனை நம்பாது சாதியுலகம்
சார்புடமையே அதன் டாம்பீகம்
உள்ளிருந்தால் பயன்
வெளியே நின்றால் உடன்
தயங்காமல் காட்டும் கோரமுகம்

வளர்ப்போம் என்றும் மனிதநேயம்
தவிர்ப்போம் தேவையற்ற மனமாயம்
நாம் உருவாக்கிய சாதீ
அணையட்டும் மெல்ல அந்தத்தீ
அதுவே நம்மை மேலேற்றும் சத்தியம்

- செல்வா

பி.கு: தினமணியில் (கவிதைமனியில்) போட்டியில் பதிவு. லிமெரிக் வகையில் எழுதியது

நட்பு ஹைக்கூ

இணைந்த இதயங்களின்
கோட்டில் நடக்கிறேன்
நட்புடன்.

****

என்றும் சண்டை, சச்சரவு
விலகவில்லை என்றும்
அருமை நண்பன்

***
பல கரித்துண்டுகளுடன்
சில வைரங்கள்
கூடா நட்புகளுடன் நல்நட்புகள்

****

நட்பு இங்கு அதிசயம்
பேசாமல் பேசுவார்கள்
எஸ்.எம்.எஸ்ஸில்

***

வேண்டும் நண்பன் இதற்கு முன்
தூரமாய் நண்பன் இதற்குப் பின்
காதலுக்கு

***
இரயில் பயணமா
நெடுநாள் பயணமா
வேண்டும் நல்ல நண்பர்கள்

- செல்வா

சொல்

சொல்லின் தன்மை
சொல்லில் அடங்காது
சொல்லும் பொருளுடன்
செல்லும் அங்கே

சொல்லால் கருத்தின்
வில்லும் வளையும்
பல்பொருள் விளக்கும்
எல்லையும் கடக்கும்

சொல்லின் உண்மை
அல்லும் அகலும்
கல்லும் கரையும்

சொல்லின் பொய்மை
பொல்லாது புகழும்
இல்லாது இயம்பும்
புல்லும் புகழப்பெறும்

சொல்லின் வேகம்
நில்லாது ஓடும்
வல்லமை வடிவுறும்

சொல்லின் சிறப்பு
வெல்லும் எதையும்
நல்வினை நல்கும்

சொல்லா சொல்லும்
நில்லா ஓடும்
வெல்லும் சிலநாள்

- செல்வா

தேர்தல்

கொள்கையில் என்றும் முரண்பாடு
கொள்ளையில் கொள்ள உடன்பாடு
திட்டமென்ன திறனென்ன
கவலை வேண்டாம்
முதலில் தொகுதிகள் ஒதுக்கீடு

வாக்குகள் மாற்றும் தலையெழுத்து
அதற்கில்லை எந்த மாற்றுக்கருத்து
நாளை என்னும் கவலையேன்?
விலையென்ன விளக்கமாக சொல்
வீணாக தேவையில்லை வக்காலத்து

எங்கள் பேச்சில் தேனொழுகும்
பாதங்கள் கைகள் தொடும்
தேர்தல் உங்கள் காலம்
விலைக்கான சாத்தியம்
நம்புங்கள் எங்கள் சத்தியம்

- செல்வா

பி.கு: லிமெரிக் வகையில் எழுதியது 

சுயநலம்

சுயம் முக்கியம் என்றீர்கள் ஆனால்
ஒன்றும் புரியவில்லை
என் நலத்தில் சுயம்
என்றால் அது தவறா
என்ன சொல்ல நானும்
வளரும் அரசியல்வாதி தானே

- செல்வா

கண்டதும் காதல்

அறியாத வயது
தெளியாத மனம்
ஆசைகளுடன் நாட்டம்
தேவையில்லா ஆட்டம்
மாயத்தில் ஓட்டம்
மனதிலிருந்து வெகுதூரம்
வாழ்க்கை இருந்தும்
கண்டதும் காதல்
கொண்டது கோலம்

தெளிந்தப் பின்
மனம் அறியும்
கண்ட கண்ட காதல்
காணும் அலங்கோலம்

- செல்வா

மனஊஞ்சல்

கண்கள் கண்களுடன் உரசல்
மனதில் கேட்கும் பல கூச்சல்
எதை தேடினேன்
எதன்பின் ஓடினேன்
ஆசையிலாடுது இன்னும் மனஊஞ்சல்

ஆனந்தம் தந்த கண்களின் உருட்டல்
அதன் நினைவுகள் நெஞ்சில் மிரட்டல்
எண்ணங்கள் உருள
மனமும் மருள
உள்ளத்தில் உருவாகும் கனவுத்திரட்டல்

கையோடு கைகள் மெல்ல பரிசம்
உடலில் கண்ட சில கூச்சம்
மனம் ஒன்ற
நிலைகள் மாற
மதயானைக்கு வேண்டும் ஒரு அங்குசம்

- செல்வா

பி.கு: லிமெரிக் வகையில் எழுதியது

நட்பு

திருப்பிப் பார்த்தால் திகைப்பு
அறியாத இதயத்தின் துடிப்பு
புரியவில்லை இன்றும்
என்று அரும்பியதோ
வாழ்வில் நண்பா நம் நட்பு

நாளும் கண்டோம் பரபரப்பு
அங்கங்கு சில மூக்குடைப்பு
நாளும் கடந்ததும்
இன்றும் கண்டோம்
நெஞ்சில் நட்பின் இருப்பு

இருக்கும் இடம் கலகலப்பு
இருந்தும் கொடுத்த பல கடுப்பு
பிரிக்க பல இருந்தும்
இணைத்தது  ஒன்று
நல்கும் நட்பின் சிறப்பு

- செல்வா

பி.கு: லிமெரிக் வகையில் எழுதியது

ஹைக்கூ துளிகள் 4

பட்டும் புரியவில்லை
ஏட்டில் எழதவும் முடியவில்லை
தேவையில்லா ஆசைகள்

***

வேகமாக ஓடியும் அடையவில்லை
தூரம் கொஞ்சமும் குறையவில்லை
என் குறிக்கோள்

***

இன்றைப் பற்றி கவலை கொஞ்சம்
காட்சிகள் மங்கலாக தெரியுது - விடு
தூக்கம் இன்னும் தெளியவில்லை

****

வளர்பிறையில்லா முழுநிலவாய் வந்தாய்
தேய்பிறை மட்டும் காணுகிறோம்
மாத சம்பளம்

****

மல்லிகை வாசம் அறியவில்லை
நிலவை இரசிக்கவில்லை - கவலைவிடு
ஆயிரம் கவலைகளுண்டு

*****

பேசா மொழிக்கு ஆயிரம் அர்த்தங்கள்
அர்த்தம் கொஞ்சமும் புரியவில்லை
இப்படிக்கு அரசியல்வாதி

- செல்வா

இலவசம் எனும் வசியம்

வசியம் ஒன்று கண்டுகண்டோம்
அவர்கள் கைகொண்டு
அவர்கள் கண்கள் குத்த
வசியம் ஒன்று கண்டுகண்டோம்

ஈயென இரத்தல் இழிந்தன்று
ஈயேன் என்றல்அதனினும் இழிந்தன்று
என்ற மொழியில்
முதல் வரியில் நின்றவரே
எங்கள் வசிய மருந்து சந்தாதாரர்கள்

வசியம் ஒன்று கண்டுகண்டோம்
வள்ளல்கள் ஆனோம்
வள்ளல்கள் ஆனோம்
அவர்கள் பொருள்களை
அவர்களிடம் திருடி
அவர்களுக்கே சில வழங்கி

வசியம் ஒன்று வளர்த்தோம்
எதை தின்றால் பித்தம் குறையும்
எனும் மாந்தர்கள் உள்ளவரை
எங்கள் வசியம் வாசம் வீசும்

எங்கள் இலவசம்
எனும் வசியம் ஒரு மருந்து
மருந்தளவே உணவு உண்ணும்
மாந்தர்களே அதற்கு  விருந்து

எங்கள் இலவசம் எனும் வசியம்
எங்கும் வேலை செய்யும்
இலவசம் என்றால்
வசதி படைத்தவனும் வாங்கி வைப்பான்
இலவசத்தை எதிப்பவனும் ஈயென இழிப்பான்
எங்கள் வசியம் சக்தியே சக்தி


வசியத்தின் விலை கொஞ்சம் அதிகம்
கவலையில்லை எங்களுக்கு
அடுத்த தலைமுறைக்கு அதை
தள்ளிவிடுவதால்

குறைகள் கண்டு குமுறல்கள் உண்டு
வசியம் உண்டப்பின்
குறையில்லா மனிதர்கள் உண்டோ
என்று எண்ணி
நாளை நம் வாழ்வு மலரும்
நம்பிக்கையில் காலம் தள்ளும்
சக்திக் கொள்ளும்

வசியம் இன்னும் வளர்ப்போம்
வாழ்வின் வசியம் சாகும்வரை

-  செல்வா

விருந்தாளி

ஓ.. விருந்தாளி
கதவு தட்டும் ஓசை
திறக்க மனமில்லாமல்
திறக்க முடிவு

வேண்டா விருந்தாளியா
எதையும் தூண்டும் விருந்தாளியே
மனத்தகவில்  என்றும்
எழுப்பும்  ஆசையோசையே

- செல்வா 

ஏட்டுச்சுரைக்காய்

கூட்டுக்கு உதவா ஆயிரம் சுரைக்காய்கள்
நாட்டுக்குள்ளே நல்ல வியாபாரம்
கூட்டமாய் வாங்க பல ஆட்கள்
முட்டி மோதி வியாபாரப் புத்தியில்
கொட்டிக் கொடுத்தனர் இலட்சங்கள்
மாட்டிக்கொண்டு முழித்து
வெட்டி வேலைகள் செய்யும் பல ஆயிரங்கள் இருந்தும்

கிணற்றுத்தவளைகளை நம்பி
கணக்கில்லா பணத்தால்
சுணக்கில்லாமல் சம்பாதிக்க
கணக்கில்லா பயனில்லா சுரைக்காய் தோட்டங்கள்

பல பெயர்கள் உண்டு சுரைக்காயுக்கு
அதற்கென்று அதன் விலை

பணயம் வைத்து சுரைக்காயுடன்
மணற்கோட்டை நோக்கி என்றும் பயணம்
பணிகள் பல உண்டு
இணையா ஏட்டுச்சுரைக்காய் தரம்
இணையும் பல மூன்றாந்தர அரசியல்கள்

கூட்டுக்கு உதவாவிட்டாலும்
நாட்டுக்கு தேவை இன்னும் ஆயிரம் சுரைக்காய்கள் .

- செல்வா

பட்டறிவு

அறிவின் ஆழமது
நிறுத்தும் காலமெது
முறையாய் கற்றாலும்
மறைவழி உணர்த்தும்
நிறைவாய் நிறுத்தும்
அறிவுரையது பட்டறிவு

பட்டால் தான் தெரியும்
பார்வைக்கு பலவை என்றாலும்
பட்டுதான் தானே அறிய
காலமும் இங்கே காணாது
உடலும் மனமும் என்றும் தேறாது

அறிவின் ஆழம் ஏற்று
பார்வைகள்  பலவும் நோக்கு
பட்டதது உன்மேலோ  பிறர்மீதோ
அறிவைக் கொள் பட்டறிவாய்

- செல்வா 

காத்திருப்பு

ஆசைகளுடன் ஏக்கம்

நாளைய கனவுகளுடன்

நம்பாமல் நம்பி

காத்திருப்பு

நம்பிக்கையின் உச்சம்

காலம் கனிய

சந்தர்ப்பங்கள் நோக்கி

காத்திருப்பு

நாளும் காதல் பேசி

காதலிடம் காதல் கனிய

காதல் எண்ணி காதலுடன்

காத்திருப்பு

வர சொன்ன நண்பன்

வரவில்லை என்று

கடிந்து கொண்டு நண்பனுக்கு

காத்திருப்பு

காலை வேலைக்கு சென்ற

கணவன் மாலை மலர்களுடன்

புதுமனைவியின்  கதவருகில்

காத்திருப்பு

நாளை முதல் கோடைவிடுமுறை

என்றெண்ணி நாளது

கடக்க பிள்ளைகள்

காத்திருப்பு

இருப்புகள், நடப்புகள்  

ஆசைகள், இச்சைகள்

காதல், வாழ்தல்

உள்ளதது  காத்திருப்பு

கோபங்கள் தாபங்கள்

காயங்கள் மாயங்கள்

விருப்பங்கள் எண்ணங்கள்

காத்திருப்பில் உண்டு

விதைகள் விதைத்தவுடன்

மரங்கள் வளர்வதில்லை

கனிகள் காய்ப்பதில்லை

காலத்துடன் ஒன்றும்

காரியத்தில் ஒவ்வொன்றிலும்

காத்திருப்பு கட்டாயம்

• செல்வா

விழிகள் பேசும்

மொழிகள் தெரிந்தும்

வழிவகைகள் இல்லாமல்

எழும் உணர்வுகளை

மொழிகள் உணர்த்தாவிடின்

விழிப்பு நிலையுடைய  

முழுமதி முகத்தின்

விழிகள் பேசும்

மொழிகள் தெரிய வேண்டாம்

சுழலும் எண்ணங்களையும்  

பழகிய மனதையறிய

பிழையன்றி தெரியும்

விழிமொழி பேச

- செல்வா

பார்வையே அழகு

பார்வையே அழகு
உன் பார்வையே அழகு
உன் பார்வையிலே அழகு
நீ பார்க்கும் பார்வையிலே அழகு

பார்வையில் ஒரு அழகு
பார்வையிடா பல அழகு
பார்வையே பொருளில் மட்டுமில்லை அழகு
பார்வையே நீயே அழகின் பார்வை

- செல்வா

மனைவி

தத்தத்தன தத்தத் தனதன
தத்தத்தன தத்தத் தனதன
தத்தத்தன தத்தத் தனதன - தனதான

அன்பிற்கொரு நெஞ்சம் எனதாகி
வந்தப்போது வெல்லும் உனைதனை
சிந்தைக்காக ஒத்தும் பொருளாக நிலைமாறி

கள்ளம்என உள்ளம் எதிராகி
விந்தைக்கென விளையும் மனமாகி
விட்டுத்தின மோத்தும் நினைவாக உயிராக

உள்ளத்தனை உந்தும் உறவாகி
மாந்தர்தமை மல்கும் ஒளியாகி
நல்வாழ்கையை என்றும் நலமாகி தருவோமோ

- செல்வா
பி.கு: முத்தைத்தரு இராக அமைப்பு தர முயற்சி.

ஹைக்கூ துளிகள் 3

என்னடா இது நாடு
கேள்வி கேட்க நான் - ஒரு குரல்
சாருக்கு ஒரு டீ

*****

பல லட்ச சொகுசு கார் என்ன
பணிவாய் கடந்து செல்லட்டுமே
குழியும் பள்ளங்களும்

****

அன்பு மனைவி இறப்பு, அழுகை
ஆர்ப்பாட்டம் - கூப்பிடு
கல்யாண புரோக்கர்

*******

வாழ்வே என்றும் சுமை
பழகிக்கொள்ள வேண்டும் முதலில்
பள்ளி புத்தகச் சுமை

****

சுத்தமே நல்வாழ்வு
சுத்தமாக மரியாதையில்லை
துப்பரவாளர்கள்

****

கொடுக்க அவர்களும் தயார்
வாங்க இவர்களும் தயார்
வங்கிக் கடன்

- செல்வா

காதல் சிந்து

கண்ணாலே மெல்ல பார்க்க - கனி
====மொழி சொல்லாமல் பறந்தது
திண்டாடுது இந்த இளசு - நல்ல
====பதிலுக்கு ஏங்குது மனசு

சொன்னாளே நல்ல வார்த்தை - நானும்
====தரையில் கால்படாமல் பறந்தேன்
தன்னாலே நிலையும் மாறுது - கண்ணே
====கவிதைகளும் நன்றாக ஊறுது
.

- செல்வா

பி.கு: சமநிலைச் சிந்து வகை சார்ந்தது
சமநிலைச்சிந்து - அளவான சீர்களைக் கொண்டு நடப்பது இது; தனிச் சொல்லின் முன் உள்ள அரையடியும், பின் உள்ள அரையடியும் தம்முள் அளவொத்து விளங்குவது.

கும்மிபாட்டு

ஆயிரம் கனவுகள் கண்டோம் - நல்ல
-------ஆனந்தம் கண்டு நின்றோம்
ஆசைகள் அங்கு வளர்த்தோம் - தேடாமல்
-------அர்த்தங்கள் இல்லாமல் தொலைந்தோம்

பேசாமல் மௌனியாய் நின்றோம் - சிலநேரம்
-----பேசிபேசி வார்த்தைகள் கொன்றோம்
முண்டியடித்து கொண்டுமுன் சென்றோம் - உள்ள
-----முரண்களில் பின்னுக்கு வந்தோம்

- செல்வா

பி.கு: இயற்கும்மி வகை சார்ந்தது

ஓரடியில் ஏழு சீர்கள் அமையும். அது 4 சீர், 3 சீர் என மடக்கி எழுதப்படும். இவ்வாறு 2 அடியும் 4 வரியும் கொண்டதாக அமையும். முதற்சீரும் ஐந்தாம் சீரும் மோனை பெறும்.
மூன்றாம் சீரும் ஏழாம் சீரும் இயைபுத் தொடை அமையப் பாடப் பெறுவதும் உண்டு.

இயற்கும்மிகும்மிபாட்டு
திருத்து | நீக்கு

ஹைக்கூ துளிகள் 2

மின்னல் வெட்டுகள்
சூடு இன்னும் தணியவில்லை
ஏழையின் வயிறு

****

கூரைமேல் ஏறி ஓட
எட்டியும் வெளியே பார்க்கவில்லை
இரவில் மழை

****

காலை கதிரவன்
ஒளி ஊடுவுருவ முடியவில்லை
பனிமூட்டம்

****

எல்லோரும் இந்நாட்டு மன்னர்கள்
சொன்னவர்களில் பல மன்னர்கள்
ஜனநாயகம்

****

நாளும் மாற்றம் தோற்றத்தில்
இருந்தும் நான் மாறாதவள்
வான்நிலவு

*****

மின்சாரம் துண்டிக்கப்பட்டது
இரவும் அழகாய் தெரிந்தது
மெழுகுவர்த்தி ஒளியில்

****

ஒட்டடை அடித்தும்
தெளிவாக தெரியவில்லை
அசைபோடும் நினைவுகள்

****

வீடும் நாடும் கடந்தேன்
நாளைய ஒளி தெரியவில்லை
நாளும் நகர்கிறது

***

கனவில் பல வெற்றிகள்
களிப்புடன் கொண்டாட்டம்தான்
அலுப்பு இன்னும் தீரவில்லை

*****

அரசனாகிருக்க ஆசை
காலை சலூன் சென்றேன்
எப்போது போல் இப்போதும்

- செல்வா

சமையல் - லிமெரிக்

நான் செய்ய நினைத்தேன் தளிகை
வாங்கி வந்தேன் சில மளிகை
சமையல்காரன் வேசம்
சமையல்கூடம் நாசம்
மனைவியின் கையில் உலக்கை

****

காலாற நடந்தேன் சில தூரம்
வயிறு புடைக்க சாப்பிட்டேன் ஸ்வீட் காரம்
நாளும் நடந்தும் பயனில்லை மாறாக
வேகமாக ஓடணும் இப்போ
வயிற்றுக்குள்ளே நல்ல சேதாரம்

****

அம்மாவுக்கு ஒரு ஆசை
அன்புமகள் கையால் ஒரு தோசை
சுட்டது வட்டமில்லை
ஒன்றொன்று ஒட்டவுமில்லை
தோசையில்லை கிடைத்தது அழுகையோசை

- செல்வா

பி.கு: லிமெரிக் நகைச்சுவை கலந்து படைப்பு

மனநிலை

நாரும் இங்கு மணக்கும்
பூவின் அருமை உணர்த்தும்
தேவையிங்கு மாற
வேண்டியவை வேண்டாவையாக
பூவும் இங்கு நாறும்

****

நாளும் இரவில் உலா
முன் நின்றும் தெரியவில்லை நிலா
வரவுகள் இருக்க
லாபம் கணக்கில் தெரிய
தேவை என்றதும் வேரிலே பலா

****

தீராமல் மனதின் தாகம்
கொள்ளும் மனதில் வேகம்
கண்ணைக் கட்டும்
எல்லையதும் மீறும்
தழலாய் எரியும் மோகம்

****

மனதோடு மெல்ல உரசல்
வயிற்றில் கரைசல்
தாவும் மனம்
தேடும் தினம்
கண்ணோடு கலந்த காதல்

- செல்வா

பி.கு: லிமெரிக் வகையில் எழுதியது

ஹைக்கூ துளிகள்

இரகசியம் அறிந்தேன்
வாழ்ந்தாலும் இறந்தாலும் சத்தம்
இலைகளும் சருகுகளும்

மென்மையும் அழகும் ஆபத்து
சிலையோ தலையோ இறுதி
வண்ணப்பூக்கள்

அதிகாலை அற்புதம்
கடற்கரை அருகில் ஓட்டம்
தாகம் இன்னும் தீரவில்லை

மூலை முடுக்கெல்லாம் தேடி
வெளியே துரத்தி விடும்
அம்மா கையின் துடைப்பம்

ஆயிரம் மணித்துளிகள்
மீண்டும் நிசப்தம்
நண்பர்கள் பேச்சு

புல்வெளி மைதானம்
ஒவ்வொரு பனித்துளிகளும்
ஒரு உலகம்

ஞாயிறும் என்னோடு
விடியல் என்ற துவக்கம்
சேவல் கூவல்

தோலுரித்து காட்டினால்
என்றும் எனக்கு ஆபத்து
பழங்கள்

விடாது துரத்தும்
ஆனந்தம் என்றும் நெஞ்சில்
வட்ட நிலவு

தொட்டதெல்லாம் பொன் ஆனது
சிலநேரம் மண்ணானது
மழை

- செல்வா

இயற்கையில்

நேசம்தரும் மலர்களே - உங்கள்
தோட்டத்தில் வேலிகள் உண்டு
திசையறியா காற்றும் வந்தது - வாசமது
வேலிகள் எல்லாம் தாண்டுதே

வானில் மாறாமல் வலம் - ஒளிகள்
ஒளிர்வதே உந்தன் உன்னதம்
ஏனோ மேகத்தில், பகலில் - வீண்மீன்கள்
கண்ணில் காணாமல் மறையும்

- செல்வா
பி.கு: - நொண்டி சிந்து வகையில் எழுதியது

என் தலைவன்

சுருங்க அறியவும் என் தலைவன்
கருத்தும் கொள்கையும் கொண்டு
ஒருங்கும் செயல்களும் கண்டு
அரங்கேற்றம் கொள்ளும் அதிர்வேட்டு

பன்முக பரிமாணம் பகர்வான்
முன்னின்றி காரியம் கொள்வான்
தன்மையுடன் கருத்து உரைப்பான்
தன்னையறிய தலைவன் ஆனான்

தளாராத முயற்சிகள் கொண்டான்
ஒளிரும் வெற்றி கொய்தான் - இன்று
வளர வளர வளைந்தான்
தளர தளரும் அவன் கொள்கைகள்

தன்னையறிய தலைவன் ஆனான்
உன்னையறியா செய்யவதிலும்…

உணர்வின் வழியில் சிலஅடியவர்கள்
உணரா வகையில் பலஅடியவர்கள்
துணை வழியில் சிலஅடியவர்கள்
பணலாபம் காணவேண்டி பலஅடியவர்கள்
உண்டு செய்து உழன்று கொண்டுள்ளான்

ஏழையின் தேவைகள் அறிவான் - அதிலவன்
பேழையை நிரப்ப வழிகொள்வான்
ஊழியம் புரியவே பிறந்தாகச் சொல்வான்
விழியில் விரலை விட்டு ஆட்டுவான்
பழிகளைப் பிறர்மேல் பிறாமல் இடுவான்

கள்ளத்தனம் கலங்காமல் செய்வான்
புள்ளியியல் பொய்யாய் அள்ளித் தெளிப்பான்
கள்ளுக்கடை திறப்பான் வந்த செல்வத்தில்
வள்ளல் வடிவம் பெறுவான்

தலையெழுத்து மாறுமென்று நினைக்க
தலையெழுத்தாய் அவனே மாறினான்

- செல்வா

காதலும் பழமொழிகளும்

உளவு கொள்ளாமல்
இளம் நெஞ்சை
களவு கொண்டாய்

கள்ளி நீ என்றதால்
முள்வேலி இட்டாயோ
தள்ளிதான் விட்டாய் அதன் மேலே

விடாது பார்வையில்
அடாது செய்தாள்
படாது படுத்தினாள்

காதல் உரலில் அகப்பட்டதால் நான்
வேதனை உழக்கைக்கும் தப்பவில்லை
யாதனையும் மாறவில்லை

கண்ணே நீ
கண்டால் ஒரு வீச்சு
காணாவிட்டால் ஒரு வீ ச்சு
இதில்லை வேறு பேச்சு

காதல் பாம்பை மிதித்து விட்டாய்
மிதித்தாரை கடியாத பாம்பு உண்டோ?

கனிந்த காதல்பழம்
தானே விழும் அறிவேன்
மானே பதில் சொல்

- செல்வா

பி.கு: பழமொழிகள் படிக்கும் போது உதித்த கவிதை

பழமொழிகள்:

உளவு இல்லாமல் களவு இல்லை
கள்ளிக்கு முள்வேலி இடுவானேன்!
அடாது செய்தவன் படாது படுவான்
உரலில் அகப்பட்டது உலக்கைக்கு தப்புமா?
கண்டால் ஒரு பேச்சு, காணாவிட்டால் ஒரு பேச்சு.
கனிந்த பழம் தானே விழும்
மிதித்தாரை கடியாத பாம்பு உண்டோ?

யாதனை - நரக வேதனை

இரசிகன்

பாலைக் காணவில்லை
பதற்றத்தில் அம்மா
பாலாபிஷேகம் செய்ய
வைத்த பாலாடா என்று
மகனிடம் சொல்ல

மகனோ பால் பசிக்கும்
குழந்தைக்கு கொடும்மா
அதை விட்டு
கல்லுக்கு விரயம்
செய்யாதே ...

சொல்லாதே அப்படி
ஆகிவிடும்டா சாமி குத்தம்
என்று அம்மா

மகனோ
மெல்ல மெல்ல
ஏறினான்
பொழிந்தான்
பாலை
தன் கதாநாயகனின்
பசிக்கொண்ட
கட்-அவுட்டுக்கு …

- செல்வா

வானவில்

சிதறலும் சில சமயங்களில்
கண்ணைக் கவரும் கவிதையாய்
வார்க்கும் வண்ணக்கலவை வானவில்

- செல்வா

மழைத்துளிகள்

மழையின்
முதல் மழைத்துளி
தொட வேண்டும்
என்று எண்ண
மனமோ சொன்னது

முதல் என்ன
கடை என்ன
ஒவ்வொரு துளியும் சிறப்பு
விரிந்த வானத்திலிருந்து
பொழியும் தொடர்மழையில்
நீ தொட்டதால் எல்லாம்
முதல் துளியே
அதன் மழைக்கு ...

- செல்வா

கண்ணாடி

விலங்குகள் பல
மிரண்டன
தானென்று அறியாமல்
கண்ணாடி முன்னே

மிரள மாட்டான் மனிதன்
கண்ணாடி என்றும்
அவன் நிஜ அகம் காட்டா வரை

- செல்வா

தொலைக்காட்சி தொடர்கள்

மனைவி
விஜய் டி.வி. பார்த்து கொண்டிருந்த
நேரம்

கவிதை வடிக்க நினைத்த போது
பல எண்ணங்கள்
“நடுவுல கொஞ்சம் டிஸ்பர்ப் பண்ணுவோம்”
என்று தடைகள் செய்ய

“கனக்சன்” இல்லாமல் வார்த்தைகள் பல வர
நடப்பது என்ன
“நடந்தது என்ன" என்று அறியாமல்
தவித்தேன்
இனி கவிதையில்
“கலக்க போவது யாரு" என்று அறியாமல்
“டைம் பாஸ்" செய்து கொண்டிருந்தேன்

“ஒரு வார்த்தை ஒரு லட்சம்" யோசனைகள்
விடு என் வார்த்தைகள் சரி செய்யவேண்டுமே …

சரி செய்ய
“டாக்டர் டாக்டர்” என்று
யாரை அழைப்பது என்று
நினைப்பு உடன்
“பாட்டி வைத்தியம்" ஞாபகம் வர

கவிதைகளில் வடிப்பது
“அது இது எது”வென்று
புரியாமல்
உணர்வுகள் ஒன்றுகொன்று
போட்டி போட்டது
“நீயா நானா”வென்று

இந்த நேரத்தில் மனைவி சன் டி.வி.க்கு மாற ….

“நிஜம்” எதென புரிய
“வாங்க பேசுலாம்” என்று
எண்ணங்களில் ஆரம்பித்தது
“அரட்டை அரங்கம்”
“அமுத மொழிகள்" கவிதையில்
வர வேண்டும் ஒரு எண்ணம்
“சொல்லுங்கண்ணே சொல்லுங்க"
மனதிடம் வார்த்தைகளைக் கேட்க
ஏன் “நகைசுவை விருந்து”
படைக்கலாமே என்று ஒரு எண்ணம்
அல்லது கவிதையில் “குட்டி சுட்டிகள்"
செய்யலாமே ஒரு எண்ணம்
இந்த “மகாபாரதம்" முடியும் முன்

மனைவி கலைஞர் டி.வி.க்கு மாற்ற …..

“நெஞ்சு பொறுக்குதில்லையே” ஒரு
வார்த்தையும் வரவில்லையே என்று
“தேனும் பாலும் ” கலந்து கவிப்பாட
நினைத்தோமே
வார்த்தைகள் “நலம் பெற" அடுத்து
“மானாட மயிலாட" உடன்
வார்த்தைகள் ஆட
“விடியலே வா" எண்ணி
பாரதியின்
“ஓடி விளையாடு பாப்பா"
பாடல் படித்தேன்


இப்போது மனைவி ஜெயா டி.வி.க்கு மாற ….

அடிக்குமா பழைய
“ஜாக்பாட்" என்று நினைக்க
“தேன் கிண்ணம்" பழைய
பாடல்களை இரசிக்க
ஆரம்பித்து விட்டேன்

கவிதை எழுதும் எண்ணம்
கொஞ்சம் தள்ளி போனது

திரும்பி நினைத்தேன்

கருத்துகள் கணத்தில் ஒளிர
வார்த்தைகள் வளைய வடிவுற
சாரத்தை சாரும் ஒலிக்க
“ஒளியும் ஒலியும்” ஆக இந்த அறு(சு)வை கவிதை

- செல்வா

நாட்டியம்

அவள் இடையோ
இல்லை என்றான்
அவள் நடையோ
நாட்டியம் என்றான்
இல்லாத நாட்டியம்
பார்க்க வீதியெங்கும் கூட்டம் !!!

- செல்வா

காதலியும் மனைவியும்

மனைவியுடன் காதலியை ஒப்பிட
ஓராசை ஓட
கவியாய் மலர

மாயத்தில் மயங்கினேன் காதலியிடம்
மந்திரத்தில் கட்டுப்பட்டேன் மனைவியிடம்

காதலுடன் களவும் கலந்ததுள்ளதால்
மனம் காணும் சாகசம்
கனவுடன் காலம் கொள்ளும்

மனையில் பொறுப்புடன் நின்றதால்
மனதில் தட்டுப்படும் சிறு ஆயாசம்
கவலையும் கனவை முந்தும்

காதல் வருவதை நினைத்து வாழும்
கற்பனையில் வாழ்வும் வளையும்
இல்லறம் இருப்பதில் இருப்பு காணும்
நிஜத்தில் வாழ்வும் நிலைக்கும்

காதலி கற்பனையின் மஞ்சனம்
மனைவி நிஜத்தின் நிதர்சனம்

கற்பனையில் மட்டும் வாழவில்லை
கற்பனையல்லா வாழ்வும் சலித்திடும்
கனவுகள் மெய்ப்பட
காதலியை மனைவியாக்கு
வாழ்வு சிறப்புக்கொள்ள
மனைவியை காதல் கொள்

- செல்வா

இயற்கையுடன்

அறிவு அளித்த வரங்கள்
அறநிலையற்ற பேராசைகள்
குறைசெயல்கள் என்றும்
கறை செய்ய செய்ய
கறுவும் இயற்கை அன்னை
அறுப்படும் மெல்ல பந்தமும்

நாளும் வளரும் தேவைகள் ஒன்றா
இயற்கையின் இயல்பான வேகங்கள்
செயற்கைகள் இயற்கையின் மாற்றாய்

இயற்கையுடன் வாழ்வொத்த எண்ணினேன்
செயற்கையாய் வாழ்வைக் கழித்தேன்
சிறகொடிந்த பறவையாய் பறந்தேன்

- செல்வா

துளிகள் - 3 ஹைக்கூ கவிதைகள்

வலிமையே என் தன்மை
ஒளிந்து கொள்ள வழியில்லை
உடையும் சிறு மலைகள்

******

மறைவில்லாமல் சொல்
மழுப்பலுடன் உண்மைகளைச் சொல்
தகவலறியும் சட்டம்

******

அடித்து திருத்துனாய் எனை
அடியோடு மாறி நின்றேன்
சிலை வடிக்கும் உளியே

******

நாட்டின் ஒரே வீடாம்
நாளும் அங்கே கூச்சல்கள்
நல் நாடாளுமன்றம்

*******

வெற்றி தோல்வியில்லை
கோடிகள் காண பல கோடிகள்
கிரிக்கெட் விளையாட்டு

*******

உலகின் ஒரு உத்தமம்
என்னை அறியாதவரில்லை
ஸ்டிக்கர் விளம்பரங்கள்

- செல்வா

துளிகள் - 2 ஹைக்கூ கவிதைகள்

தேவைக்கென்று செய்
தேவை இல்லாத்திற்கும் செய்
மறியல் போராட்டம்

******

கொடுத்தால் நாட்டுக்கு
கொடுக்கா விட்டால் எங்களுக்கு
வரியும் அதிகாரியும்

******

மரணமே வியாபாரம்
மரணிக்கா விட்டால் நட்டம்
காப்பீடு திட்டம்

******

சொர்க்கத்தில் நானும்
எதைப் பற்றியும் கவலை கொள்ளேன்
தாய்மடியில் குழந்தை

*****

பொய்களுடன் வளர்ப்பு
வருடங்களில் நீதிமானாக
நீதிபதி பதவி

*****

பிணியெல்லாம் தீர்க்கும்
தீர்ந்தப்பின் மீண்டும் மயக்கம்
மருத்துவமும் செலவும்


- செல்வா

துளிகள் - ஹைக்கூ கவிதைகள்

வானம் தூரத்தில்
பூமி தானும் சுற்றுகிறது
பசிதரும் மயக்கத்தில்

********

ஆட்சியே காலடியிலே
தொகுதியை சிங்கப்பூர் ஆக்குவோம்
கேட்பவன் கேனையானால்

*******

நல்லோர் காணா மழை
அல்லோருக்கு ஆயிரம் மழை
தந்திடுமே வசூல் மழை

*************

படிக்காத மேதை
படித்தும் படிக்காத மேதை
நம் அரசியல்வாதிகள்

*******

கூழை கூலிகளும்
அரசாங்கத்தின் அதிகாரிகள்
ஆம் ஆமாம் சாமிகள்

*******

கஜானா காசில்லை
நிரப்பவே தன் குடும்பம் தியாகம்
குடிபோதையின் குடிமகன்



- செல்வா

விசித்திர உலகம் - பகுதி 3

விசித்திர உலகம் - பகுதி 3

வீரம் - காளை கட்டுதல்
*******************************

காதல் செறிந்த
காதல் உலகைக்
கண்டீர்
வீரம் விளைந்த மண்ணின்
வீரம் காண வாரீர்
வீர விளையாட்டைக்
காண வாரீர்
விந்தைகள் பலவுண்டு
விரைந்து வாரீர்

கட்டுக்கடங்கா காளைகள்
காணீர்
காண கண்கள் அஞ்சும்
கேளீர்
திமிரான காளைகளின்
திமிலைப் பாரீர்
திகைத்து நிற்பீர்

காளை கட்டுதல்
விளையாட்டின் பெயராம்
ஜல்லிக்கட்டு போலே தோன்றும்
வித்தியாசங்கள்,
விவரங்கள்
அறிவீர்

வளர்த்த காளைகளல்ல இவைகள்
வளர்ந்த காளைகள் தானே
வளர்ந்த காளைகள்.
வன்மையைத் தன்மையாய்
வடித்தவை
வேகத்தில் துடியாய்
துடிப்பவை.

காளையைக் கண்டு
கலக்கம் காணாதீர்
வீரர்கள் காண இப்பக்கம்
விரைவீர்
வீரத்துடன் அவர்தம்
விகேவத்தைப் பாரீர்
கண்களின் உள்ள கருணை
காணீர்

காளையைக் கட்ட
சிங்கங்களைப் பாரீர்
ஆண் சிங்கங்கள்,
பெண் சிங்கங்கள்
எல்லா சிங்கங்களைக்
காணீர்

வீரம் ஆணென்று பெணென்று
பேரம் காணாது
வைரம் பாய்ந்த நெஞ்சும்
வைராக்கியம் போதும்
விளையாட்டின் விதிகளைக்
கேளீர்

காதல் கொள்ளார்
களத்தில் செல்லார்
காலணிகள் அனுமதியார்
காளை ஒன்று வீரர் ஒன்று

காளையின் திமிலுடன் ஓட்டம்
கருணையால் காதல் மனத்தால்
காளையிடம் வரும் மாற்றம்
காளையும் அடங்கும் அவர் வசம்

காளையின் மேல்
கருணை குறைய குறைய
காற்றில் மிதப்பர்
காளையிடம் எளிதில் தோற்பர்

வென்றோருக்கு
காளையுடன் பல பரிசு
மேலும் நல்ல உபசரிப்பு

துணிவும் கருணையும் வலிமையும்
ஒரு சேர விளையாட்டு
எங்கள் விளையாட்டு

காதல் கொண்டோர் எல்லோரும்
காளையும் கொள்வர்
காதலையும் வெல்வர்

- செல்வா

(தொடரும்.....)

விசித்திர உலகம் - பகுதி 2

விசித்திர உலகம் - பகுதி 2

காதல் ஈர்ப்பு விசை
*************************


காற்றை ஆனந்தமாக சுவாசித்து
காலாற நடக்கலாம்
வாரீர்
எங்கள் உலகில் நடக்கலாம்
வாரீர்

கண்ணை கவரும்
காலணிகளைப்
பாரீர்
அற்புத காலணிகள்
பாரீர்
அணிந்து
மெல்ல நடத்து வாரீர் !!

விசித்திர உலகின்
மிஞ்சும் கண்டுபிடிப்பு
விசேச காலணி இந்த
அற்புத காலணி

காலணி புகழ் பாடும்முன்
அறிவீர் எங்கள்
விசித்திர உலகின்
உத்தமம் ஒன்றை!
…….
…….
காதல்ஈர்ப்பு விசை

பூவுலகத்தில் ஒரு
புவிஈர்ப்பு விசை
விசித்திர உலகத்திற்கு
காதல்ஈர்ப்பு விசை

காதல்ஈர்ப்பு விசையின்
தனித்தன்மை
தனிநபருக்கு தனி அளவாம்
காதல் அளவே
காணுமதன் ஈர்ப்பின் அளவு

அதிகாதல் அதிஈர்ப்பு
காதல் அகல அகல
காற்றிலே மிதப்பீர்

கற்பனையில் மிதப்பது எளிதிங்கு
காற்றில் மிதப்பது கடினம்
சிறு காரியமும்
சிரமமே

அற்புத காலணிகள்
அவசியம் கேளீர்
அணிய அதுதரும் ஈர்ப்பு சக்தி
விசித்திர உலகில் உங்கள்
வாழ்வும் எளிதாம்

அற்புத காலணி
காதல் குறியீடு அளவை அளக்கும்
ஈர்ப்பின் அளவை வளைக்கும்

சிறுகால இடைவெளியில்
காதல் அளவு வளையும்
அதிகாதல் கொண்டவரும்
அணிய இங்கு அவசியம்

காலணிகள் இங்கு இலவசம்
அவசரம் வேண்டாம்
கேளீர்
பயன்பாட்டிற்கு தரவேண்டும்
பணம், ஈர்ப்பின்
பயன்ப்பாட்டிற்கு மட்டும்

காதல் குறைய குறைய
பயன்பாடு ஏறும்
காதல் வளர்ப்பீர்
கவலை மறைப்பீர்

சிற்றுலா பயணிகள்
பயன்பாடுகள்
என்றும் இலவசம்

- செல்வா

(தொடரும் ....)

விசித்திர உலகம் - பகுதி 1

காண வாரீர்! காண வாரீர்!
விசித்திர உலகம்
காண வாரீர்!
மனம்விரித்து காண வாரீர்!
விந்தைகள் பல உண்டு
சிந்தை சிறக்க
காண வாரீர்!
அகந்தையற்று
அக கண்களோடு காண வாரீர்!

சிற்றுலா வருவீர்
எங்கள் விசித்திர உலகை
சுற்றி ஆனந்தம் கொள்வீர்

நிலவுகள்
*************

வான்மதிகள் இரண்டு
வானத்தில் வந்து உலவுது
காணீர்
காலை மாலை என்று
காலம் மாறாது
களங்கமில்லாமல்
கண்ணில் தெரிது
காணீர்

அமாவாசை பௌர்ணமி
என்று பேதமில்லை
தேயும் வளரவும் என்ற
தேற்றம் இங்கில்லை

கண்ணில் அது காணவில்லை
என்றால் கவலை கொள்ளுங்கள்
காதல் உங்கள் நெஞ்லிருந்து
மறைந்தது எண்ணி
நிலவுகளை அது
மறைத்தது எண்ணி

காதல் கொள்வீர்
காதல் கொள்வீர்
கண்ணுக்கு இனிய நிலவுகள்
காண தவறீர்

வண்ணத்தில் நிலவைக் கண்டால்
குழம்பாதீர்
எங்கள் வானத்தில்
பல வண்ணத்தில்
நிலவுகளைக் காணலாம்
கண்டு களிப்பு அடைவீர்

விசித்திர உலகின்
விந்தை ஒன்றைக் கேளீர்
நிலவுகள் இரண்டு என்றாலும்
தரும் காட்சிகள் பல

காணும் உயிர் ஒவ்வொன்றும்
அதன் உரிய நிலவுகள்
தனியே காணும்
அற்புதம் இங்கு உண்டு
வண்ணங்கள் அங்கு
மாறும் அவரவர்
எண்ணங்கள் போல்

நிலவுவிடு தூது
நிதர்சனம் இங்கு
நிலவும் நிலைக்கண்ணாடியாய்
உலவும்

உன் காதல் மனத்திற்கு ஓர் நிலவு
உன் காதலர் மனத்திற்கு ஓர் நிலவு
உன் மனப்போக்கிற்கு ஏற்ப
ஒரு நிலவில் மாற்றம்
உன் காதலரின் மனப்போக்கிற்கு ஏற்ப
மற்றொரு நிலவில் மாற்றம்

உன்னை உணர்த்த உன் காதலுக்கு வாய்ப்பு
காதலரின் தன்மை அறிய உனக்கும் வாய்ப்பு

நிலவு வண்ணங்களுக்கு என்று தனி
அர்த்தங்கள் இங்கில்லை
அகராதிகள் ஏதுமில்லை

உன்னை நீ அறி
உன்காதலையும் நீ அறி
வண்ணங்கள் அர்த்தங்கள்
அதுவே தெளியும்

இங்கு சிலர்
நிலவுகளில்லாமல் வாழ்ந்தவர்கள்
நிம்மதியில்லாமல் வாழ்ந்தவர்கள்
வரலாற்றுடன் மறைந்தவர்கள்

எங்கள் நிலவுகள்
கவிதையில் வருபவையல்ல
கவிதையாய் வாழ்பவை
காதலுக்கு சாட்சியல்ல
காதலின் காட்சிகள்
எடுத்துரைக்கும் மாட்சிகள்

- செல்வா

( விசித்திர உலக உலா தொடரும்.....)
பி.கு: Fantasy உலகம் சிறிது (அல்ல பெரிய) கற்பனைகளுடன் எழுத முயற்சி. விமர்சனங்கள்/கருத்துக்கள் அன்புடன் வரவேற்க படுகிறது.

முதல் விமான பயணம்

காற்றை கிழிந்து பேரூந்து பயணம்
கல்லூரி சென்ற தருணம்
தடதட சத்தத்துடன்
இரயிலில் வெளியூர் பயணம்
நினைவுகள்
கண்மூடி திறந்த நேரத்தில்
மெல்ல வந்து போனது

ஆயிரம் எண்ணங்கள் அலைப்பாய
சில்லேன்று ஒருகாற்று வருட
உணர்ந்தேன் நான் இருப்பது இப்போது
சென்னை விமான நுழைவாயில்

வெளிநாட்டு வேலை
அதைவிட மனதில் முக்கியமாக
முதல் விமான பயணம்

வாழ்வின் பெரும் திருப்பம்
வளர்த்த பலநாள் விருப்பம்
வடிகால் கண்ட தினம்

ஆனந்தம் என்று அளவாட முடியாது
தாய், தந்தை, அக்கா, அண்ணன்,
நண்பர்கள் விட்டு
பிரிந்து செல்லும் நேரம்
இருந்தும் மகிழ்ச்சி ரேகைகள்
என் முகத்தில்

ஆயிரம் ஆலோசனைகள்
அறிந்த்ததும் சில அறியாததும்
பாஸ்போர்ட் எங்கே?
டிக்கெட் எங்கே?
லக்கேஜ் எங்கே?
அதே கேள்விகள் பலரிடம் இருந்து

விமான நிறுவன கவுண்டரில்
செய்வன செவ்வன செய்தேன்
அரசாங்க குடியேற்ற முறைகள்
முழுவதும் முடிந்தது

படியேறி வணக்கத்தைப் பெற்று
விமானத்தில் பிரவேசம்
பட்டிக்காரன் மிட்டாய் கடையைப்
பார்த்தானாம் வாசகம்
நினைவில் வர

இருக்கை அமர ஒரு பெருமூச்சு
ஆர அமர்ந்த நெஞ்சு

சீட் பேல்டின் இயக்கவியல்
இயல்பாய் அறியவிட்டாலும்
இனிதாய் முடித்தேன்

மிக கவனமாக கவனித்தேன்
பேராசிரியரின் பாடத்தைவிட
விமானப் பணியாளரின்
பாதுகாப்பு விளக்கங்கள்

ஓடுபாதையில் விமானம் வானில் ஏற
என்வாழ்வும் வளமாய் ஏறும்
எண்ணம் என்னில் எழ
கட்டங்கள் சிறுபுள்ளியாய் மாறியது

அன்புடன் அன்னை உணவு
இல்லை என்றாலும்
விமானத்தில் முதல் உணவு
இல்லை உணவு பொட்டலம்(!)

எப்போதும் கவனித்து சாப்பிடு
என்றாள் அன்னை
அர்த்தம் புரிந்தது
காலிடுக்கில் பொட்டலத்தைப்
பிரித்து சாப்பிட
நிச்சயம் தேவை
அதிக கவனம்

ரொம்ப ஆட்டம் போடாதே
சொன்ன நண்பர்கள்
ஞாபகம் இப்போது
ஆட்டம் காணும் விமானத்தில்
ஆட்டம் காணாமல்
எப்படி கழிவறை செல்ல?

ஒவ்வொரு நிமிடமும்
பயணத்தின் பரவசம்
அசர சிறு கண் உறக்கம்

எழுகையில் விமான இறக்கம்
என் முதல் விமான பயணம்
இனிதாய் முடிந்தது

எத்தனை விமான பயணங்கள்
என்றாலும் முதல் பயணம்
என் நெஞ்சில் மறையா புதினம்

- செல்வா

காதல் வழி

காதல் வழியில் என்றும் பயமடி
மடியில் கணம் உந்தன் மனமடி
கவரி மானும் நானும் ஓரினமடி
நீயே எந்தன் அடியும் முடியுமடி

நிதமுன் செய்கை எனக்கு அத்துப்படி
நாலா புறமும் வெடிக்கும் சரவெடி
நாளுமுன் நினைவு எந்தன் முகமூடி
நாளும் என்னை ஆட்டும் மகுடி

நன்று படுத்தும் உன்காதல் நையாண்டி
மனமும் தினம் ஏந்தும் தீச்சட்டி
இருந்ததும் நாடும் உன்காதல் திருவடி
வேளைக்கு வேளை எடுப்பேன் காவடி

- செல்வா

இரவின்மடி

இரவின்மடி
உந்தன் நினைவுமடி
பொருந்தா அடி
கவிதைப் போல் உறுத்துதடி
அது நீயென்னை காணா கணமடி

***

உறக்கம் தாரா மயக்கமாய்
கொய்தும் கொய்யாப்பழமாய்
நீ உரைத்த காதலாய்
கண்ணில் சுழல்வாய்

***

இரவில் அறிந்தேன் ஏகாந்தம்
காதல் கொண்ட மகரந்தம்
உயிரில் உணர்ந்தேன்
உன் மின்காந்தம்

***

இல்லை என்று நீ சொன்னதில்லை
இரவில் என் நினைவில் என்றுமில்லை
அது என்னாதிக்க எல்லை .

- செல்வா

காதல் மருந்து

ஹைக்கூ/லிமரைக்கூ:

பசலை கண்டது
உண்பதிற்கு இங்கில்லை
காதல் மருந்தது

லிமரிக்:

காதல் காதல் அதுசெய்
நோதல் நோதலது பசலைநோய்
வைத்திய வகையறியா
வருத்தம் வேண்டாம்
காண்பாய் காதலே மருந்தாய்


வெண்பா:

காதலென்று காதலென்று காதலால் நோய்வசம்
காதலுடன் காதலால் காதலிடம் ஏங்க
பசலைபிணி காணதுவும் காணாசெய் - என்றும்
காதலே உன்மருந்து உண்

- செல்வா
பி.கு: மூன்று வகையில் எழுத ஆசை.

பல விகற்ப இன்னிசை வெண்பா :
சீர்கள் வாய்ப்பாடு - அசை தளை
கா/தலென்/று/ - கா/தலென்/று/ கூவிளங்காய் - நேர் வெண்சீர் வெண்டளை
கா/தலென்/று/ - கா/தலால்/ கூவிளங்காய் - நேர் வெண்சீர் வெண்டளை
கா/தலால்/ - நோய்/வசம்/ கூவிளம் - நேர் இயற்சீர் வெண்டளை
நோய்/வசம்/ - கா/தலு/டன்/ கூவிளம் - நேர் இயற்சீர் வெண்டளை
கா/தலு/டன்/ - கா/தலால்/ கூவிளங்காய் - நேர் வெண்சீர் வெண்டளை
கா/தலால்/ - கா/தலி/டம்/ கூவிளம் - நேர் இயற்சீர் வெண்டளை
கா/தலி/டம்/ - ஏங்/க/ கூவிளங்காய் - நேர் வெண்சீர் வெண்டளை
ஏங்/க/ - பச/லைபி/ணி/ தேமா - நிரை இயற்சீர் வெண்டளை
பச/லைபி/ணி/ - கா/ணது/வும்/ கருவிளங்காய் - நேர் வெண்சீர் வெண்டளை
கா/ணது/வும்/ - கா/ணா/செய்/ கூவிளங்காய் - நேர் வெண்சீர் வெண்டளை
கா/ணா/செய்/ - என்/பது/ தேமாங்காய் - நேர் வெண்சீர் வெண்டளை
என்/பது/ - கா/தலே/ கூவிளம் - நேர் இயற்சீர் வெண்டளை
கா/தலே/ - உன்/மருந்/து/ கூவிளம் - நேர் இயற்சீர் வெண்டளை
உன்/மருந்/து/ - உண்/ கூவிளங்காய் - நேர் வெண்சீர் வெண்டளை

சித்தாந்த லிமரைக்கூ

மனமோ உள்ளபடி
மறைப்பொருள்
அம்மாவின் அடுப்படி

*****

வெட்டவெளி பரம்பொருள்
தேட காணவேண்டும்
உன்னுள் உறை உருப்பொருள்

*****

தொடர்களின் நிகழ்வு
தொடர்புகள் புலப்படா
பட்டாம்பூச்சி விளைவு

*****
உபஅணுக்களின் நாட்டியம்
குவாண்டம் கோட்பாட்டில் உண்டு
சிவ அண்ட நடனம் (Siva’s Cosmic Dance)

******

கணபொழுது எண்ணம்
நிகழ்வில் வாழும் முறை
புத்தனின் போதிமரம்

செல்வா

------
பி.கு: கருணா ஐயா அவர்கள் கருத்து உரையாட்டில் விளைத்தது. அவர் வார்த்தை விளையாட்டில் விளைந்த சில இங்கே:

மனமோ உள்ளபடி
பரம்பொருள்
திருவடி தேடியபடி!

மறைபொருள் தேட
உள்நோக்கிப் பயணம்..
அவனையே பாட!

வியாபார ஹைக்கூ

அறிவில் அழகு பூக்காடு
விலைபோகா சந்தைகள்
உப்பில் கருவாடு

*******

ஏற்ற இறக்க வியாபாரங்கள்
தர்க்கங்கள் லாபமில்லை
பங்குசந்தை நியாயங்கள்

*****

ஏழை தற்கொலை கட்டாத வட்டி
கவலையில் பணக்கார கடனாளிகள்
வங்கியில் கடன் தள்ளுபடி

******

படிப்பறிவு அகல்விளக்கு
வேலையின் அவசியம்
அடிப்படை செல்வாக்கு

******

விளைச்சல் குறைச்சது கொஞ்சம்
பருப்பு விலை வானளவு உயர்வு
ஆன்லைன் வர்த்தகம்


- செல்வா

நிழலின் வெளிச்சம்

நிழலும் உன்னுடன் வரும்
வெளிச்சம் உன்மேல்
விழும்வரையில்

நிழல் உன்னுடையுது என்றாலும்
நிழலின் நிளமும் அகலமும்
வெளிச்சம் விழும் விதத்தில்

நிழலும் உன்செயலை ஒற்றும்
ஆயினும் வெளிச்சம் விழும்
கோணம்தான் நிர்ணயிக்கும்

நிழல் என்றும்
வெளிச்சம் புகா பொருளுக்கே
ஒளிவற்ற எண்ணங்கள் கொள்ளுங்கள்
நிழலற்ற நிஜத்தில் வாழ்வோம்

- செல்வா

காதல் நிறம்

காதலின் நிறமாம் சிவப்பு
இரத்தத்தில் உறைந்தால்
மென்மையான நினைவிதழ்களாய்
ரோஜாவை ஏற்றுக்கொள்
ஆயிரம் எண்ணத்தில் அற்புதமாய் மலர்ந்த
செந்தாமரையை ஏற்றுக்கொள்

காதலின் நிறம் வெள்ளையாம்
வெள்ளை மனதினர் எளிதில் வசம்பட
மனம் வீசும் வாழ்வை எண்ணி
மல்லிகையை ஏற்றுக்கொள்
இரவில் சுவை கூட்டும் காதலுக்காக
அல்லியை ஏற்றுக்கொள்

காதல் நிறம் நீலமாம்
வானம் போல் மனம் விரிந்ததால்
நோக்கும் பார்வையிலே குழைந்தால்
அனிச்சம்தனை ஏற்றுக்கொள்

காதல் நிறமாம் மஞ்சள்
மங்கள திரு உருவுடன் நீ
காதல் சூட்டைத் தணிக்க
ஆவாரம்பூதனை ஏற்றுக்கொள்

எத்தனை பூக்கள் எத்தனை பூக்கள்
அத்தனை வண்ணம் அத்தனை வண்ணம்
ஆயிரம் மலரும் காதல் மனதில்
அத்தனை செய்யும்
காதலுக்கு அர்ச்சனை

- செல்வா

நடப்பு - லிமரைக்கூ

ஓட்டை இடுவோம் விற்பனை
பட்டும் அறியோம் படிப்பினை
தலையில் தானே மண்ணிடும் யானை

******

வாழ்வில் என்றும் வஞ்சனை
வருத்தம் கொள்ளும்போது மட்டும்
கடவுளிடம் செய்யும் பிராத்தனை

*******
வாய்ப்புகள் தரும் திருப்புமுனை
தூங்கி வடிந்தனபல தினம்
வாழ்வு இன்றும் தெருமுனை

******

வெளியே அதட்டியடித்து உருட்டல்
நாளை என்பதே பயம்
தலைவனுக்கு அடிவருடல்

******

மேடையிலே ஆயிரம் அறைகூவல்
ஆராவரத்துடன் கைதட்டல்
முடித்ததும் பணத்திற்கு அணிவகுத்தல்

*******

தேர்தல் நேரம் கட்டும் இறக்கை
நல்ல விடியல் வேண்டி
கட்சிகள் விடும் அறிக்கை

*****

களவாட ஒரு ஏற்பாடு
கலவரம் ஆங்கங்கே
சாதிக்கு வேண்டும் ஒதுக்கீடு

****

மானுடத்துடன் மனதைக் கட்டு
மாட்டு இறைச்சி ஏற்றுமதி
தடை செய் ஜல்லிக்கட்டு


- செல்வா